المقص الذي لا يعرف الراحة

اليوم الموافق ل 29 ماي 2008 تم النزول بلا رحمة أو شفقة على المعقل الأخير لليوتيوب من تونس, أو هذا اللّي مشا في بال رفيقنا "الأخ الأكبر". المهم, اليوتيوب متاع روسيا تصنصر و لكن مازال فما يوتيوب متخبي, نشاالله أبو مقص ما يطيحش بيه: http://in.youtube.com

أكبر شرور العولمة و الإمبريالية الصهيونية اللي تكسّرلي البطاطا و تفرعسلي نظامي الداخلي أنو ساعات ما نلقاش الوقت حتى باش ناكل و أحيانا أخرى يبدى عندي وقت فارغ ماعندي ما نعمل فيه, كيما توا , لذلك قررت ليوم باش نصنع جوي و نحكي على موضوع يمس كل أبعاد الوجود متاعي ولي هو السجائر.

قبل كل شئ, السجائر سم زعاف و تسبب أمراض خطيرة إضافة للكحّة الليلية و ضعف الشاهية من دون ما نذكرو المصروف الزائد أما بالله واحد عايش في بلاد كيما بلادنا, لواش يحافظ على صحتو؟ بأنقص نهار تعيشو في تونس خير, بالإضافة للتأثير الإيجابي للسجائر إلي يخليك تشوف في كل شئ باهي و نسملاح خصوصا السيجارة إلي نتكيفها عالصباح عالخواء, و زادة ما ننسواش إلي كيف تتكيف ديما عندك شعول: الشعول عندو زوز وظائف رئيسية, أولها أنو كي تطلب منك آنسة مدخنة ممشوقة القوام (ربي يكثرهم) شعول تكون بالمرصاد و الوظيفة الثانية هي أنك كيف تفد من حياتك تنجم تنتحر وقتلي تحب هذا بالنسبة للعباد اللّي ما ينجموش يصبرو لوين يقضي عليهم النيكوتين و القطران و سائر السموم. توا نتعداو لنقطة أساسية, نوعية السجائر: أحنا في تونس, و الحمد و الشكر, عنا سجائر نوعيتها مقبولة (على عكس ليبيا مثلا) و بأسوام شبه مقبولة زادة (بالمقارنة مع فرنسا و البلدان الأوروبية بصفة عامة) أما أنا بإعتبار أني إنسان وطني ياسر, و أيضا زوالي ياسر نعتبر إلي الليجار أحسن نوع سجائر على وجه الأرض, يليه المرلبورو الأحمر كي نبدى مستكرز (كيف يبدى عندي الفلوس شعوري بالوطنية و النخوة و الإعتزاز نحرق دين أمو في السيجارة)  فما زادة الدان هيل, أما ما نتكيفو كان كيف نبدا الحنجرة متاعي مسدودة نظرا لأنو هالنوع هاذة يعطيك إحساس أنو عندك أوتو روت في حلقك, ضربة ضربة لكلّ أمراض الأنف و الأذنين و الحنجرة. الحاجة إلي تخلي الليجار دخاني المفضل هو أنو أولا منتوج تونسي ثانيا كونو يحمل نسبة هامة مالنيكوتين اللازم باش نقوم كل صباح تقريبا 0.8 مغ نيكوتين, أما أنا متأكد إلي هاذي نسبة مغشوشة على خاطر ساعات نطيح بباكوات تتكيف منهم سيجارة واحدة قولش عليك تكيفت حقل متاع تبغ, أما ميسالش كي جات في الزيادة.  أما أنا إلي دفعني الحقيقة باش نكتب على هالموضوع تفشي الليجار المضروب, هو في الحقيقة موش مضروب, ماكل طريحة تكون أقرب, و نحب نوجه رسالة مفتوحة لشركة التبغ و الوقيد باش تعالج هالأزمة اللي مررتلي عيشتي و خلاتني متعارك مع حماصة الباساج الكلّ.

كلمة أخيرة للإخوان و الأخوات المدخنين: كيفاش تعرف الليجار المضروب؟ أول حاجة ريحتو مختلفة, تماما كيما ريحة الأنتار عافانا و عافاكم اللّه, ثانيا الكتيبة اللّي على ورق السيجارة تكون يإما غامقة و  واضحة بصورة تامة و إلا تكون ذهبية اللون, في الحالات الزوز رجع الباكو للحماص خاطرو مضروب. الدليل الأخير هو أنو كيف تجبد من ليجار مضروب و تخزن ما تحسش بالحرقة المعهودة في رواريك, تماما كإنك تتكيف في الأنتار.

معا من أجل دخان أفضل, معا من أجل مستقبل أشرق.

مبروك للبنان و العقبة لينا

ألف مبروك للبنايين و الحمد لله عليهم كتفاهمو أخيرا على رئيس توافقي, و نحب نهنأهم زادة لدخولهم موسوعة غينيس للأرقام القياسية كونهم البلاد العربية الوحيدة اللي قعدت بدون رئيس لأكثر من نهارين (المدة اللازمة لتحظير جنازة الرئيس السابق عادة) و الجدير بالذكر زادة أنو الشعب اللبناني الشقيق تحصل على رقم قياسي آخر, بإعتبار أني لبنان البلاد العربية الوحيدة إلي فيها مواطنين عاصرو أكثر من زوز رؤساء. ألف مبروك للبنان و الأمة العربية جمعاء على هالملاحم القياسية و الصولات و الجولات الإفريقية و الدولية.

حول الدين و الدولة 2

علاش موش ممكن دولة دينية تتقدم؟ خلينا نبعدو عالحجج الباهتة كيما "من المستحيل أن تتقدم بينما تلوي عنقك للوراء" و ماشابه, ولو أنو كلام صحيح في المطلق, بمعنى أنو كان تمشي فالشارع وأنت تخزر وراك بش تلبس أول بوتو في ثنيتك, أما المسألة المطروحة أعقد من عبد الله يمشي في الشارع.

بعد ماتفاهمنا في ضبابية تعريف الدولة الدينية في حد  ذاتها, يولي موش ممكن نتناولو بالتحليل مفهوم الدولة الدينية في المطلق دونك خلينا نحكيو شويا تاريخ و أمثلة تاريخية أكثر منو مفاهيم مجردة. أنا ننظر للإسلام السياسي كأزمة فكرية و حضارية موش كتيار سياسي فعلي, و نتصور زادة إللي الإسلام السياسي يحمل أسباب زوالو في ذاتو كحركة سياسية, اللي تتمثل أساسا في القطيعة بين الخوانجية و الواقع, توا مثلا, أغلبية الحركات الإسلامية تدعو للعودة إلى الجذور و السلف الصالح إلى هو حسب رأيهم فترة الخلافة الراشدة, الأمر البديهي أنو ظروف نشأة الدولة الإسلامية في الوقت هذاكا مغايرة تماما على حالنا المكربة كعالم ثالث توّا هذا من ناحية, من ناحية أخرى المشاريع الإقتصادية و الإجتماعية اللي تقترحها الحركات الإسلامية في معظمها (ما عدا الإسلام التقدمي) غاية في السجاذة و البساطة, ما تتعداش الزكاة للقضاء عالفقر و إلغاء النظام البنكي و عودة المرأة للمنزل باش تتحل ماشكلنا الإقتصادية الكل و تولي "حالّة معانا". لكن فات المنظرين من النوع هذا أنو قبل الفترة الإستعمارية لا كان عنا نساء تخدم و لابنوك و لا والو, و شطر الشعب يطلب في أضرحة الأولياء. لذلك يكفي أنو مشروع مالمشاريع الإسلاموية تطبق في بلاد باش يفهمو العباد البسطاء إلي وعيهم يقارب درجة اللاوعي, أنو الحركات هاذي حركات فاشلة قبل كل شي في أني تسير بلاد. هذا مالناحية الإقتصادية, مالناحية السياسية و الأخلاقية بدرجة أقل, هل فعلا الدولة الدينية تطبق العدل الإلاهي في الأرض؟ الجواب بديهي يظهرلي, على خاطر دولة دينية إسلامية ولا مسيحية ولا حتى شيطانية, متأكدة بصورة قطعية إلي هي على صواب و الأديان الأخرى على ضلالة, دونك طبيعي بش تصادرلهم حقوقهم كمواطنين كيما يظهرلها, مثلا الإخوان في مصر يراو إلي الأقباط ما عندهمش الحق في الترشح و الإنتخاب و تولي القضاء إلخ... فما بالك بالملحدين و الزبراطة و المفكرين و التيارات السياسية الأخرى اليسارية خاصة؟ أنا نتصور إلي مالمستحيل تلقى مجتمع أحادي العقيدة و حتى و كان تلقى مجتمع أحادي العقيدة مالمستحيل كان تلقى العباد الكل يتشاركو في نفس وجهات النظر فيما يتعلق بتعاليم دينهم, على خاطر الدين ماهوش علم محسوس ولا حسابات و معادلات رياضية, الدين يتعلق بغيبيات و مفاهيم متعالية عالوجود المادي الكل, مالمستحيل حتى باش تقارن بين المعتقدات الدينية متاع زوز عباد على خاطرها تتجاوز المعقول, فما بالك بشعب كامل؟

حول الدين و الدولة

شنوا معناها دولة دينية؟ و علاش موش ممكن دولة دينية تتقدم؟ زوز أسئلة طرحوهم برشا مفكرين و فلاسفة و حتى مدونين, دونك أنا زادا بصفتي فيلسوف زماني بش ندلي بدلوي في الموضوع هذا. السؤال إلي نتحدى أي مخلوق باش يجاوب عليه هو: شنوة معناها دولة دينية؟ شنوة هي؟ فاش تتمثل اليات تطبيق الشرع الإهي و إرادة الله في الأرض؟ ياترى الدولة الإسلامية هي دولة طالبان أم دولة إيران أم الدولة إلي يبشرو بيها الإخوان المسلمين في مصر؟ الكلهم يحكيو بإسم الجلالة و يبشرو بتطبيق الإرادة الإلاهية في الأرض و الكلهم يعتبرو أنفسهم على حق و الجماعات الأخرى على ضلالة و لا يبصرون و الكلهم يعتبرو القران دستورهم أما كي تجي تثبت يختلفو في قضايا جوهرية كيما النقاب و الجزية على المش مسلمين و النظام البنكي و هدر دم الكفار إلخ... معناها مالأخر, الكلهم يقدمو أنفسهم على أساس الممثلين متاع ربي و كأنو الله اللي كيكرّز يقول لشئ كن فيكون حجتو بكمشة بشر متشبهين بجماعة القرن السابع بش يطبقو تعاليمو و أوامرو, و اللي متتعداش قصان الريوس والإدين إلخ... و على ذكر اللحية, الخوانجية يدعيو إلي اللحية من السنة على خاطر الرسول الأكرم كان مربي لحية, عندي سؤال للسطك هذوما, يخي في القرن السابع كان الرسول جايبهي هيبي و عامل لحية؟ تي ماهو العباد الكل كانو عاملين لحيي, الموضة متاع العصر هذاكا كانت اللحية معناها الرسول ما جاش بيها حكاية البركوس, فقط تبع موضة عصرو, و ياريت كان السطك متاع القرن الحادي و العشرين يتشبهو بالرسول كيما ينبغي و يتبعو موضة عصرهم. نعودو لموضوع الدولة الدينية, أنا اللي إنجم نستخلصو مالملاحظات السابقة إنو لا وجود لنظام سياسي محدد إسمو دولة إسلامية في المطلق بماأنو كل تيارات الإسلام السياسي تصادر المصطلح هذا و تشبع سبان و تكفير في التيارات الأخرى كما أنو مافماش تنظير فعلي لهالدولة الإسلامية, فأغلبية التيارات و من منطلق إيمانها بإطلاقيتها تؤمن بأنو يكفي توصل للسلطة بش تولي جنة على الأرض دونك الخوانجية مايراوش داعي بش ينظرو لدولتهم تي حتى كي تجي تشوف البرامج الإنتخابية متا الخوانجية في مصر مثلا تلقاها ما تتعداش الشعارات الفارغة كيما الإسلام هو الحل إلخ و لا زادة فما واحد مالكوادر متاع الخوانجية بش نتفادى ذكر إسمو تفاديا للمقص صرح بالحل الفوري و الشامل لمشاكل التنمية و البطالة في العالم العربي السيد إلي جاب الصيد من كرارزو قالك, شد عندك, سبب البطالة في بلادنا هو خروج المرأة لسوق الشغل, كان جينا نقتديو بالسلف الصالح و المرا تقعد فالدار راهو عنا أكثر مناطق شغل للرجال  و هكاكا إنقصو من نسبة البطالة و نحققو التنمية الشاملة. الحصيلة خمسة و خميس عليه السيد هذا, ج. سميث زمانو. نشالله نواصل الموضوع هذا لاحقا كي نلقى الوقت...

إلى أهالي الحوض المنجمي

نهدي أغنية "كل ثورة و إحنا فرحانين" متاع الشيخ إمام, لكل شاب و راجل و مرا و مراهق و رضيع و كلب و بقرة و قطوس و حجرة في الحوض المنجمي. كل إنتفاضة و تونس بخير.

عبدة الشيطان

في الصيف إلي فات ظهرت موضة جديدة فالجرايد إلي أنا ندرجهم ضمن صنف البابيي توالات حاشا من سمع, إلي هي موضة ما يعرف بعبدة الشيطان, إلي أنا يضهرلي برشا عباد ما عطاوهاش قيمتها اللازمة, مش الحكاية الفارغة متاع عبدة الشيطان في حد ذاتها (خاطرها بكل بساطة لا عندها لا ساس لا راس) أما توقيت الحملة في الصحف الصفراء و الخطاب المعتمد و من ثم إختفاءها بصفة تامة منذ شهور عندو أكثر من دلالة, أولا نحب نوضح إلي الحملة الكل ما هيش صحوة ضمير مفاجئة متاع كمشة صحافيين من فصيلة الكلبيّات المطيعة, و لا سبق صحفي حبت الصحف تجلب بيه القرّاء كيما يصير في شمال المتوسّط و الدول المتحضرة, الحكاية تتجاوز هذا الكل حسب رأيي, على خاطر على رغم تفاهتها إتجبدت تقريبا في كل الجرايد, حتى الجرايد إلي عندها شبه مصداقية (أساسا الصباح) و في مقال مقتضب صدر في جريدة مستقلة (الوحيدة إلي نقصيها من صنف البابيي تولات). أنا كيف تابعت المقالات تأكدت من أنو الحكاية جايا من أعلى أهرام قرطاج في محاولة لذرّ الرماد في العيون عالحملة ضد الحركات الإسلامية و المظاهر متاعها, أساسا الحجاب, بش يقنعو بسيطي العقول إلي الحملة ما تستهدفش الحريات الشخصية و حرية العقيدة أما تستهدف المظاهر الشاذة عالمجتمع و التراث والحضارة متاعو. برشا عباد بش يقولو إلي التحليل متاعي ياسر أبله و دغفة أما راهو بش تفهم نظام أبله و مسطك يلزمك تتحلّى إنت بيدك بشويا بهامة, بلغة أخرى يلزم تهبط لمستواهم بش تفهمهم. و الّي أدى بيا لهل 'النظرية' مش ذكائي الفذّ فقط و إنما زادة التجارب متع الدول العربية الأخرى كيما مصر و الأردن رغم الإختلاف في بعض التفاصيل, أما عالعموم الأنظمة الحاكمة في الدول السابق ذكرها إستعملت خرافة عبدة الشيطان بش تبين إلي هي ما تستهدفش الدين في حد ذاتو و في بعض الأحيان لإمتصاص الغضب و الإنتقادات متاع الخوانجية كيما في الأردن و الكويت بنسبة أقل. و الجدير بالقول إلي في تونس الحملات "التبريرية" مالنوع هذا ماهيش جديدة: في الأسبوع إلي سبق أحداث الخبز مثلا, التلفزة التونسية عملت حملة دعائية ورّاو فيها خبز ملوح فالزبلة و حاجات مالنوع هذا لتبرير الرفع متاع أسعار الخبز و المعجنات اللي تلى. أما شخصيا اللي جلب إنتباهي للحكاية هذي يتجاوز برهانها على الخطأ الإلاهي اللي رماني في جنوب المتوسط (الحمد لالله عالشط مش أبعد شويا في مالي و ما شابه مالدول المقمّلة) أما خاصة إختفاءها تماما من جميع الصحف و حتى الحملات الأمنية ضد محبي الروك و المتال توقفت بصفة فجئية, ذكائي الفذ يعاود يتقدم مرة أخرى و يجيب مجموعة مالإحتمالات في تفسير هالإختفاء المريب:
في إطار التعبئة العامة للإنتخابات القادمة, السلطة تراجعت على سياسة التغزل بأطراف معينة و تهميش أطراف أخرى في محاولة بش ترضي العباد الكل, إلي هو مستحيل على خاطر الخوانجية ما يرضيهم شي.
في داخل السلطة بيدها فما أطراف متصارعة, و لا بالأحرى ماهيش على نفس طول الموجة كيما يقولو في بلاد الرّوم (و لاّ ماهيش راكبة على بعضها كيما يقولو في بلاد الشوم) و هالأطراف هذي عندها و جهات نظر متباعدة بخصوص هالموضوع, خاصة و أنو الأطراف الخارجية تمارس في ضغوطات على أبو الهول في مسألة الحريات و الحقوق الأساسية, و هذا حسب رأيي إلي بعد إنطلاق الحملة بعدة أشهر رجح كفة المعارضين للحملة على ما يعرف بعبدة الشيطان. الإحتمال هذا ممكن أما مستبعد على خاطر الكلام إلي قلتو مجرّد تمحيص و إجتهاد شخصي, و إلى حد الآن ما عندي حتى جاسوس تحت راس أبو الهول بش نأكدو.
و لاّ ببساطة الأمريكان و أولاد عمهم الأوروبيين كلمو أبو الهول و قالولو راك خريت فيه, طيشت المعارضين السياسيين في الحبس سكتنا, طيشت النقابيين معاهم سكتنا, و زدت الحقوقيين و الطلبة و الخوانجية و الشيوعيين و التقدميين و الفلاحة و العمال و النساء و الرجال و الكلاب و القطاطس و الدجاج نورمال سكتنا, أما واليت تبعث في اللّي يسمعو في المتال و الروك وراء الشمس راك خريت فيه برشا. أنا حسب رأيي هذا هو الإحتمال المرجح و أنتوما دليلكم ملك.